Un rapporto puro, idilliaco, intimo con Madre Natura incontaminata.
Acri, domenica 3 luglio 1955.
Matrimonio Luigi Ritacco.
Mia madre commara d'anello, raccontava:
"Angiudina, 'a mamma 'e da sposa, ccu la figlia ranna, avìano sferrettatu fusilli a sira prima.
'i volìanu fari ccu lu sucu e la carn'e crapa, all'usu 'e l'acritani.
Ma 'a cummarella, chi li piacìa la cucina mia, ha dittu... 'facìmulli ccu li vrasciodi e li purpetti all'usu lonnivucchisu, ch'è chjù liggiaru e ni 'mpara cumma Rosina.
Cum'era longa chilla tavulata, èramu chjù 'e cinquanta mmitati!
All'aria aperta, mmianz'all'erba e alla natura...
Era lu mis 'e lugliu, facìa cavuru, ma ogni tantu na nuva ammucciava lu sulu e si stava na meraviglia.
A cucinari c'era n'amicu 'e compa Luigi, ch'era puru cjanchiaru, e li tri figli facianu 'e cameriari.
Tutti quanti si cumprimentavano ccu lu cuocu, i fusilli eranu na cosa fina, e un ti dicu ppe li vrasciodi ca l'acritani ull'avianu mai mangiati.
U patr 'e compa Luigi, avia sarbatu, 'e l'annu prima, dua varridi 'e vinu russu 'e di Pennini.
Quanti ntruzzi e quanti brindisi alli sposi e alli parìanti!
Oliolì, oliolà, campa cent'anni chini viva cca!
Vivimu tutti quanti a na tirata, cu vinu minti forza e allegria,
i lli sposi ni tiagninu bisuognu, quannu si libberanu e sa bella cumpagnia!
M'inne vippitu pur'io dua bicchera, ccu tuttu ch'era 'ncinta e cincu misi.
Dopp' i purpetti, anu felliatu nu prisuttu, chi l'orduru si spannìa ppe tutta l'aria.
Alla finita, supa u portabagagliu 'e na siaciantu, su arrivati quattru gistìari 'e chilli luonghi. I durci 'e du furnu 'e Adìa: bucchinotti, ncinetti e minn 'e monaca.
E pu su arrivati i musicanti, ccu chitarr e tummarini. anu fattu a serenata alli dua padummi, doppu l'anu votata a tarantella tutti quanti, mmianz a tanta gridi 'e gioia e de allegria".
